अस्पतालमा दैनिक हुने फोहरको उचित व्यवस्थापनमा सघाउदै दुई जर्मनी मेडिकल इन्जिनियर

२०७४, मङि्सर १० आइतबार 835 Views

बेनी अस्पतालमा दैनिक हुने फोहरको उचित व्यवस्थापनमा जर्मनबाट आएका दुई मेडिकल इन्जिनियरले सघाइरहेका छन् ।

करिब तीन साता अगाडि नेपाल आएका जर्मनको एक विश्वविद्यालयमा मेडिकल इन्जिनियरिङमा अध्ययरत मेक्सिमिलियनल र एन्टोनियाले अस्पतालभित्र दैनिक संकलन गरिने फोहरको वर्गीकरण र विसर्जनको विधिसहित अन्तर्राष्ट्रिय मापदण्डको फोहर विसर्जनका लागि इन्सिनेटर प्रविधि जडान गरेका छन् ।

जर्मनको एक गैरसरकारी संस्था र बेनी अस्पतालको संयुक्त लगानीमा जर्मन र भारतमा निर्मित सो प्रविधि उपयोगमा ल्याउनुका साथै अस्पतालभित्र जलाउन मिल्ने र नमिल्ने फोहरको वर्गीकरण र विसर्जन गर्ने तरिका, फोहर संकलन गर्दा अपनाउनुपर्ने विधिलगायतका विषयमा चिकित्सक, स्वास्थ्यकर्मी र कार्यालय सहयोगीलाई तालीमसमेत दिइएको अस्पताल प्रमुख डा रोशन न्यौपानेले बताए ।

अस्पतालमा गुणस्तरीय सेवासँगै सफा र सुन्दर बनाउने अभियानमा चिकित्सक समेत मासिकरूपमा सरसफाइ अभियानमा संलग्न भएपनि र विभिन्न संघसंस्थाबाट समेत सहयोग भएपनि व्यवस्थापनमा देखिएको समस्याले दिगो हुन नसकेको अवस्थामा इन्सिनेटर प्रविधिको प्रयोगले सहज बनाएको सम्बद्ध चिकित्सकको भनाइ छ ।

फोहर विसर्जनका लागि बनाइएको इन्सिनेटर नजिक फोहरको प्रकारका बारेमा जानकारी दिने सूचना, फोहर राख्ने कोठासमेत बनाइएको छ । जर्मनमा रहेको एक गैरसरकारी संस्था र बेनी अस्पतालको लागतमा निर्मित इन्सिनेटरमा आवश्यक पर्ने प्रविधिसमेत जर्मन र भारतबाट ल्याइएको अस्पताल विकास समितिका अध्यक्ष माधवप्रसाद रेग्मीले बताए ।

अस्पतालभित्रका कर्मचारीलाई फोहर संकलनदेखि विसर्जनमा अपनाउनुपर्ने विधिका बारेमा तालीम दिइएपछि अस्पताल विकास समितिले नियमित अनुगमन र निगरानी गर्ने जनाएको छ । फोहर व्यवस्थापनका लागि दुईजना कर्मचारीले दैनिक काम गर्नुपर्ने भए पनि तत्काललाई नियमित काममा रहेका कर्मचारीलाई नै जिम्मेवारी दिइने छ । अस्पतालबाट निस्किने ६० देखि ८० प्रतिशतसम्म फोहर संक्रमित फोहर नहुने र बाँकी फोहर संक्रमित हुने भएकाले पनि फोहर विसर्जनमा सचेत हुनुपर्ने जर्मनी मेडिकल इन्जिनियर मेक्सिमिलियनको भनाइ छ ।

युरोपका अस्पतालमा चिकित्सक जस्तै महत्व फोहर व्यवस्थापनलाई दिने गरिएको छ भन्दै उनले अस्पतालभित्र देखिने फोहरले बिरामीको अपमान हुने बताए । बेनी अस्पतालमा काम गर्ने क्रममा अस्पतालका चिकित्सक, स्वास्थ्यकर्मी र कर्मचारीबाट अपेक्षा गरेभन्दा धेरै राम्रो सहयोग पाएको बताउँदै इन्जिनियर मेक्सिमिलियनले आगामी दिनमा पनि यस अस्पतालमा सक्दो सहयोग गर्ने प्रतिबद्धता जनाए ।

फोहरलाई जैविक र अजैविक गरी छुट्याउने तरिकाबारे कार्यालय सहयोगीलाई जानकारी गराइएकाले काममा सहज भएको अस्पतालले जनाएको छ । अस्पतालले गुणस्तरीय स्वास्थ्य सेवा सरसफाइसहितको जनचेतनामूलक कार्यलाई समेत प्राथमिकतामा राखेको छ । रासस

सम्बन्धित खबर